على بابـــك يـا ســـــت
د. رؤوف ناظمي / الرفيق محجوب عمر
على بابك يا ست .. أنا ع الباب
محسوبك و أنا .. من يومي و انا
أشرق اغرب .. ابعد أقرب
اطلع جبال .. اٍنزل هنا
أرقد في جوف الارض للدود و انحني
يقف على راسي جحر يشهد على عشقي
محسوب ولد محسوب
للست و الأحباب
و كأنه كان مكتوب
اطلع انا المحسوب
من يومي و اكون ع الباب
* * *
بطنين و أنا التالت
اتوحمت على البلح في عز امشير في التالت
اتوهمت من الحسد
اتقلبت قالت
راح اندر الندر
ندرنِ عليا يارب
لو جه ولد او بنت
ح اوهبه للست
و النعجة لو جابت لها
و اللحمة بالنابت
و جيت انا ياست .. و النعجة كمان جابت
* * *
خطفتني فوق كتفها قبل السبوع ما يتم
و جت تخش المقام مرضوش
قال ايه عليها الدم
قالت ابوه طاهر يخش معاه
قالوا البساط أتلم و كان البساط مفروش
رجلين ابويا متشققه و سوده
و طرحة امي كمان متمزقه و سوده
و اصل البساط من عجم و لا حنا قد المقام
و لكن بقى نيجي هنا
الندر يدخل للامام
و احنا ما ندخلش المقام
الــــواد ده ليكي يا ست
محسوبك و انا وهباه
ان مات قضى و مكتوب
و ان عاش يكون محسوب
و كأنه كان مكتوب
اطلع انا المحسوب .. من يومي و اكون ع الباب
* * *
و جيت أنا يا ست
جيت إزاي بالقدرة
لا وصفة جاهزه و لا بُدره
رضعت بز امي لحد ما هميت
و رضعت ضرع الجاموسة
رضعت ما اتهنيت
و سرحت ع الغيط
حفظت جدول الضرب .. بالضرب و الدودة
عرفت ان الأف لها همزه ممدوده
كتبت و قريت .. شديت قلوع المراكب .. و قمت جسور
عشقت ما اتهنيت ..
عشقت قولة أه و قولة لا
و برضه لقيت
و لفيت على راسي وشاح اخضر بلون ارضك
إلا كفوف القدم دابت على ارضك
و بقيت اقرب على بابك يردوني
اقول عاشق يردوني
اقف ارد الغريب عن بابك يردوني
كأني غريب يردوني
و أجري على الشباك
شباك مقامك دهب و ضفروه قضبان
و انا بكره القضبان يا ست بكره انا القضبان
ياما سهرت الليل داخل القضبان يا ست
ياما حدفت بعيني خارج القضبان يا ست
لحد طرف التوب ما المسه بالرمش
و أحن و ادوب و لا قلت اتوب
و كأنه كان مكتوب
اطلع أنا المحسوب
من يومي و اكون ع الباب
* * *
بيطمنوني يا ست
إن كان على دخول المقام .. ح أخش المقام
الشرط لازم أنام
أغمض عيني و لا انطقش الكلام
لــكن دنا بتكلم و أنا نايم
و حتى ان نمت يا ست
راح اصحى ساعة الفجر
مين يدن الفجر غير واحد
بيسعى لرزقه ساعة الفجر
غير اللي داق الوصال و الهجر
ما اقدرش انام ما اصحاش
إلا في جوف الارض
حق عليا و فرض
وحتى في جوف الارض
حا يقف على رأسي حجر يشهد على عشقي
محسوب ولد محسوب
و كأنه كان مكتوب
اطلع انا المحسوب ..
من يومي و اكون ع الباب
* * * * *
ليست هناك تعليقات:
إرسال تعليق